Ay-ayatenmi a Kakabsat ken tattao ti Dios,
Nasaem a sugat ti sinagaba ti Santa Ina nga Iglesya kadagitoy naglabas a dua a lawas gapu kadagiti pammabasol manipud iti opisina ti Philippine Charity Sweeptakes. Patien ti kaadwan nga awan basol dagiti Appo nga Obispo, ngem agduadua dagiti dadduma. Saan a mailibak a maladingitan unay ti entero a Simbaan. Makipagladingit kami nga Pastor yo. Kas pammatulad ni Apo Jesus a Naimbag a Pastor, dakami a pastoryo, iyebkasmi ti saem ken luksawmi ta nasugatan ken nasaktan kayo gapu kadagitoy a pasamak. Aglidaykami ta adu kadakayo, nangruna kadagiti agtutubo, marigrigat, babassit a gimong (BECs) ti nariribukan gapu ti maipagarup a di panagbagay dagiti sao ken aramidmi.
Iti baet dagitoy a ladladingit, dawatenmi nga sipapakumbaba kadakayo ti naparbeng a panangipatay tayo ti pammabasol ken ti naregget a panagsukimat ti kinapudno dagiti naipabasol. Saraken ken suroten tayo koma a siaayat ti pudno.
Igunammi kadakayo a sisasagana dagiti Appo nga Obispo a napabasol ti panangawatda ti aniaman a responsibilidad a patauden dagiti aramidda, agraman panangsangoda ti amin, no mapaneknekan a maikaniwas dagiti aramidda kadagiti linteg ken Constitusyon ti Pilipinas. Ipaganetgetmi met kadakayo nga awan dakes a panggep dagiti aramidda. Gapu ti tarigagay ken anepda a tumulong kagaditi tattaoda, nagkurangda ti panangammo kadagiti sebbang ken parikut a patauden ti panangawat kadagitoy “grants”. Ikarida ngarud ti panangaramidda ti amin a gannuat tapno laeng maagasan ti sugat a pinarnuay dagitoy ket agmaymaysatayo koma a dumur-as a napnuan namnama.
Igunamgunam mi pay kadakayo, ay-ayatenmi a kakabsat, nga iti masakbayan, amirisenminto dagiti bambanag ken programa a pakikammayetan ti Simbaan ken ahensyas ti gobierno tayo tapno matulongan dagiti marigrigat, ken kasta pay ti pannakasurot dagiti linteg iti benneg ti Simbaan ken gobierno. Inkamto met tingitingen dagiti “values” kas maibatay ti nakaawagantayo nga agbalin a disipulos ni Apo Jesuscristo. Ikumitmi dagiti bag-bagimi iti daytoy dalan ti personal ken kagimongan a panagbalbaliw kas dawaten ti Apo kadagiti amin a disipulos na. Agpakpakaasi kami ngarud kadakayo ta kuyogen dakami iti dalan ti agtultuloy a panagbalbaliw.
Iyebkasmi manen kadakayo ti napalaus a ladingitmi gapu ti tuok a pinataud dagiti naglabas a pasamak. Ammo ti managayat nga Apo ti ayatmi kadakayo. Dagitoy dagiti sao ti Psalmista; “Ti sakripisyok, isu ti managbabawi nga espiritu, Ti napakumbaba, managbabawi a puso saanmonto nga iwaksi (Ps. 51) Ket ti isu met laeng a Psalmista a nagsao iti Apo, alaenmi met laeng dagiti saona tapno mapatibker ken nasu-ot kami; “Ayatem ti pudno iti uneg ti puso, ngem iti kaungan toy pusok, isurunak iti kinasirib”.
Manipud iti Catholic Bishops’ Conference of the Philippines,
+Nereo P. Odchimar, DD
Obispo ng Tandag
Pangulo, Kapulungan ng mga Obispong Katoliko ng Pilipinas
Hulyo 11, 2011
