(Panginsayod han mga Obispo han Pilipinas Hiunong han Nasudnon nga Konsultasyon Sinodal o National Synodal Consultation, July 4-7, 2022, Tagaytay City)
Hinigugma nga Bungto sa Dios:
Nabati kita kan Papa Francisco nga dayuday nananawagan nga kita magin Singbahan kanay mga kaapi nag-uungara nga mag-ukoy dida ha pagkaurusa ngan paghiusa (communion), panginlabot (participation) ha kinabuhi han Singbahan, ngan diri humunong hin pagbiling han mga gudtiay, mga nawawara ngan mga nauurhi (mission). Usa ini nga panawagan nga magin Singbahan ha pamaagi han Sinodo o Singbahan Sinodal— usa nga Singbahan nga naglalakaton nga urusa.
Ginbaton naton ini nga panawagan pinaagi hin pagpatikang ha aton mga diyosesis, mga prelatura ug mga bikaryato apostoliko (apostolic vicariates) hin mga buruhaton hin paggiparupamati ha tagsa tagsa, tikang hin magkadirudilain nga hugpo (sector) hasta ngadto ha barangay, labi na adton aadto ha mga sagyad nga kahimtang (laylayan) ug mga napabay-an ha aton mga katilingban. Kahuman hini nga mga pakighiruhimangraw, kami nga mga Obispo, upod an amon mga taglawas nga layko, mga kabugtuan nga konsagrado ug mga inordenahan (kleriko), nagbuhat hin upat ka adlaw nga katitirok, an Nasudnon nga Hiruhimangraw Sinodal (National Synodal Consultation), ha Tagaytay.
KAMI NANGITA (We LOOKED). Dako an amon kalipay han amon pakasaksi han nagpapadayon nga pagtoo han aton katawhan, an kadasig han aton mga ministro, an nagtutubo nga diyalogo hin buhat o paggibalyuay hin buhat ha sakob ug gawas (han Singbahan). Nakita namon in mga lamrag.
Kundi nabido kami han amon pakasantop nga hirayo pa kita han aton inop nga magin Singbahan han mga Kablas, ug han amon pakabati han mga hingyap ug mga pangandoy hadton mga higrayo ha Singbahan. Nakita namon an mga pagkahiruhigrayo han katawhan (gaps) ngan mga sarado nga porta ha amon buhat pagpasamwak han Ebanghelyo. Nakita namon in mga lambong.
An amon ginkauruyunan nga ungara nga bunga han pagkatimpo han kalipay ug kabido ha amon mga kasingkasing nagin usa nga hitabo hin pagkasarangkay, kundi naghingyap pa kami hin mas hilarom nga pahiusa (communion).
KAMI NANMATI (We LISTENED). Nakabati kami hin makusog nga mga tingog nga naghahangyo ha aton, mga inordenahan (clergy), mga konsagrado nga kabugtuan ug mga layko nga kasugbong nga bumaya kami ha amon mga kahimtang nga kinaruruyagan (comfort zones) basi magin mas nakarawat, bukas ug nakakabaton ha katungdanan (accountable), ug mas napaid. Ini nga mga tingog naaningal han kan Papa Francisco panawagan nga kita magin ‘Singbahan nga nagawas’ ug aada hin ‘nagpapadayon nga misyon’. Kahuman han mga pagpaangbit ug pamati ha mga istorya tikang ha ubos, ginbuksan namon an amon mga kasingkasing ug hunahuna ha Pulong han Dios ug mga pag-aghat han Espiritu Santo. An amon urusa nga pagbasa han pag-aghat han Espiritu nanmunga ha amon hin ungara hin mas hiluag nga panginlabot, mas hilarom nga paghiusa ug nababag-o nga misyon, nagtutugway ha amon nga mag-inop ngahaw para han Bungto han Dios. Inabat namon an pagtawag han gugma han Amay nga natan-aw dida kan Jesus ha krus.
Gintatawag kita ha GUGMA. Ha pagbaton han gugma han Dios, igintatalaan ta an aton kalugaringon ha misyon.
Gin-aaghat kita nga ‘magbukas hin mga porta’, labi na an porta han pagbalik sa Dios han tagsa ha aton, han aton mga parokya ug mga gintungdanan (institutions). Nangangahulugan ini nga magbubukas kita han mga porta hin pakighitapo (encounter), pamati ug paghiruhimangraw; an mga porta hin pagbag-o han aton kalugaringon nga kinabuhi ug han aton mga inordenahan; an mga porta ngadto hin mas dako nga pagsaksi han kasimple ug pagpaubos; an mga porta han pagin maupay nga mga tinapuran (stewardship), maupay nga pamahala, ug pag-ataman han mga tinuha han Dios; an mga porta han pagpauswag han pagporma ha pagtoo ug pagdukwag han kaudganan han mga layko, ug pagtukod han aton mga katilingban; an mga porta han pagbag-o han aton mga paagi hin pagbuhat ug pagserbi (structures and ministries), — nga binabayaan adton mga butang nga diri nakakabulig ug iginpapadayon adton mga naghihimo ha aton nga katilingban; mga porta nga nagtutukod hin mga tulay hin pagkaurusa, napapahirani an higrayo ug nagdudukwag han pagkaturupong.
Aton gibubuksan an mga porta basi kita makagpadayon ha misyon ha pagbiling hadton mga higrayo, han mga may lain nga panan-aw ha ira kahimtang, han mga ginsalikway; basi makighitapo, mamati ug makighimangraw ha aton mga kabugtuan ha magkalainlain nga mga hugpo ug pagtoo; ha paghingita hin mga paagi hin maupay nga pakigsabot ha ekumenismo, pakighimangraw ha mga taglawas hin lain nga mga tuluohan, politika ug social media.
Ginbubuksan ta an aton mga mata, talinga, hunahuna ug kasingkasing tungod kay mapainobsanon nga kinakarawat ta nga diri aanhi ha aton an ngatanan nga kabatunan ha mga pakiana han aton panahon, samtang aton liwat nasasantop an kaupayan ug an mga upa nga kinarawat gihapon haddton aton mga igkasi tumutuo ngan mga kabugtuan ha lain nga mga tuluohan.
Nagpapasalamat kami ha damo nga mga bayhon, mga mata, mga talinga ug mga kamot kanay kabukas ha hunahuna ug kamadoroto nakabulig kaupay nga matuman an aton pagin sinodo.
Upod in paglaom ug pagtoo dida han kalooy han Ginoo, aton gindidig-onan an hingyap pagin ‘Sinodo’—pagkita, pamati ug paghigugma nga aton paagi hin kinabuhi nga nagtutubo ngadto hin pagin Singbahan ha Pilipinas nga mapainobsanon, nakarawat ug maki-aangayon ngan bukas ha ngatanan nga mga kabugtuan.
Natawag kita han iroynon nga pagtimangno ug pag-ampo han Baraan nga Birhen Maria ug ni San Jose, samtang padayon kita nga naghahangyo han kalooy ug paghigugma han Santisima Trinidad: Amay, Anak ug Espiritu Santo.
Ha ngaran han Catholic Bishops’ Conference of the Philippines,
+ PABLO VIRGILIO S. DAVID, D.D.
Obispo han Kalookan
Presidente han CBCP Julyo 11, 2022
