Pinalangga namon nga mga Katawhan sang Dios,
Padayun naton mabati-an si Papa Fransisco nga nagapanawagan para sa Simbahan nga ang iya mga katapo nagatinguha sa pag-isa kag harmonia (communion), sa pagpakigbahin (participation) sa kabuhi sang Simbahan, kag wala nagakataka sa pagpapangita sa mga kubos, mga nadula kag wala natagaan sang igtalupangud (mission). Ini ang panawagan sang isa ka Sinodal nga Simbahan – ang Simbahan nga nagapanglakaton sing tingob.
Ginsabat namon ang iya panawagan paagi sa pagsugod sa amon mga dioseses, prelatures kag apostolic vicariates ang Sinodal nga mga eksperyinsya sang pagpamati sa tagsa-tagsa, halin sa nagkalainlain nga mga sector tubtob sa barangay nga lebel, ilabi na gid sa mga yadtong mga mabudlay kag malayo nga duog kag sa mga yadtong mga malayo sa mga kristianong katilingban ang ila mga nahamtangan.
Matapos ang ining mga paghinun-anun, kami nga Obispo, kaupod sa mga representante nga mga layko, mga persona nga nahalad ang kabuhi sa Dios kag mga kaparian, nagdihon sang 4 ka adlaw nga pagpakigsapol, The National Synodal Consultation, sa Tagaytay.
NAGTULOK Kami. Ini nagdala sa amon sang kalipay nga nakita ang mapinadayunon nga pagtuo sang amon mga katawhan; ang pahatag sang ikasarang sang mga manug-alagad sa simbahan, ang nagadamo nga mga pahinun-anun sang mga hilikuton sa sulod kag sa guwa sang pagtulu-ohan. Amon nakita ang kasanag.
Apang nagdala man sa amon sa kasubo nga nakita nga malayo pa sa amon handum sang isa ka Simbahan sang mga kubos, kag mabati-an ang madalum nga mga handum sang mga yadtong malayo sa Simbahan. Amon nakita ang mga upang kag indi kami bukas sa amon mga hilikuton sang ebanghelisasyon. Amon nakita ang kadulom.
Ang amon ginapakig-ambitan nga balatyagon nga naggikan sa ginhugpong nga kalipay kag kasubo sa amon mga tagipusuon amo ang balatyagon sang pag-isa, pero kami nagahandum pa gid sang madalum nga pagpakig-angot sa kada isa.
NAMATI Kami. Amon nabati-an ang mabaskog nga tingog nga gatawag sa amon, ang amon mga kapari-an, mga persona nga natalana ang kabuhi sa pag-alagad sa Dios kag mga kabulig nga mga layko sa pagpamati sa panawagan sa pagpanibag-o, sa pagwa sa amon mga kina-andan nga matawhay nga mga kinagawia-an, nga mangin ma-abiabihon, mangin bukas kag may salabton, dugangan ang pagkamaluluy-on. Ang ining mga tingog nagapaklaro pa gid sang tinaga sang panawagan ni Papa Fransisco nga mangin ‘Simbahan nga nagahilway’ kag isa ka ‘mapinadayunan nga kahimtangan sang mission.’
Matapos ang pagpakig-ambitanay kag pagpamati sa mga istorya gikan sa mga katawhan, amon ginbuksan ang amon mga tagipusuon kag mga panghunahuna sa pulong sang Dios kag nagpamati sa pangagda sang Balaan nga Espirito. Ang amon tingob nga pagpamalandong nagdala sa amon sang handum para sa masangkad nga pagpakigbahin, ang madalum pa gid nga pag-isa kag panibag-o sang mission, nagtulod sa amon sa paghandum liwat sang katawhan sang Dios. Amon nabatyagan ang panawagan sa paghiguma sang Amay nga sarang makita kay Jesus sa Krus.
GINTAWAG KAMI SA PAGHIGUGMA. Bilang sabat sa paghigugma sang Dios, amon ginasugdan liwat ang amon kaugalingon para sa misyon.
Ginatulod kami sa ‘pagbukas sang mga pwertahan’, ilabi na gid ang pwertahan sang kaugalingon, parokya kag kabug-usan nga panibag-o. Buot silingon, para sa amon, ang masangkad nga pwertahan sang pagkita, pag-inistoryahanay kag pagpinamati-ay, ang pwertahan sang pagpanibag-o sang amon kaugalingon kag mga kapari-an; ang pwerthan sang pagpangabuhi sang pagka-simple kag pagkamapa-inubuson; ang mga pwertahan sang pagkatinugyanan, maayo nga panggobyerno kag pagdampig sang mga tinuga sang Dios; ang mga pwertahan padulong sa pormasyon sang pagtuo kag sa pagtugyan sa mga katungdanan sa mga layko, kag pagbalay kag pagpabakod sang mga katilingban; ang pwertahan sang sang panibag-o sang sang mga struktura kag mga hilikuton, – ang pagbiya sang mga indi na makabulig kag ang paghakos sa sadtong mga nagahimo sa aton bilang isa ka katilingban, mga pwertahan nga nagadala sa aton sa pagbalay sang taytayan, ang pagkapan sang mga upang kag pagpasanyog sang pagka-alalangay.
Amon ginabuksan ang mga pwertahan para sa aton tanan agud sa pagwa kag magpanglakaton liwat para sa misyon – sa pagpangita sa mga yadtong yara sa mga malayo, may kinalain, kag wala nataga-an igtalupangod; sa pagkita-ay kag pamati-ay upod sa aton mga kauturan sang nagkalainlain nga pagtulu-uhan; sa pagpangita sang mga posibilidad para sa maayo nga pagpakig-angot sa patag sang ekyumenismo pagpakig-istorya sa nagkalainlain nga pagtuluohan, politika kag social media.
Amon ginabuksan ang amon mga mata, dulunggan, panghunahuna kag tagipusuon, tungod amon mapainubuson nga ginabaton nga wala kami sang bug-os nga sabat sa mga palamangkutanon sang aton panahon, samtang amon ginakilala ang mga kaayuhan sang amon mga katawhan kag sang mga katawhan nga wala nagapakig-ambit sang amon pagtu-o.
Mapinasalamaton kami sa mga madamo nga mga guya, mga mata, mga dulunggan kag mga kamot nga ang ila pagka bukas kag pagpangabudlay nagdala sang kadalag-an sang Sinodal nga eksperyinsya.
Sing may pagla-um kag pagtuo sa kaluoy sang Dios, amon ginatugyan ang amon mga kaugalingon sa Pagpanglakaton sing Tingob (Sinodo) – pagtulok, pagpamati kag paghigugma bilang alagyan sang pagpadayun, nga kami magtubo sa pagkamapa-inubuson, maabiabihon kag simbahan para sa tanan sa Pilipinas.
Kami naga-ampo sa iloynon nga pagtatap sang Mahal nga Birhen Maria kag sa pagdampig ni San Jose, samtang padayun nga nagapangayo sang kaluoy kag paghigugma sang Santisima Trinidad: Amay, Anak kag Espirito Santo.
Sa ngalan sang Catholic Bishops’ Conference of the Philippines:
+ PABLO VIRGILIO S. DAVID, D.D.
Bishop of Kalookan
CBCP President
July 11, 2022
